111 Сезон

КОНФЕДЕРАЦИЯЛӘР КУБОГЫ КӨННӘРЕНДӘ КАМАЛ ТЕАТРЫ 6 СПЕКТАКЛЬ ТӘКЪДИМ ИТӘ

17-23 июньдә, Конфедерацияләр Кубогы 2017 көннәрендә, Г.Камал исемендәге Татар дәүләт Академия театры 6 спектакль тәкъдим итә. Шәһәребез кунаклары һәм казанлылар соңгы елларда куелган, төрле фестивальләрдә катнашкан һәм дистәләгән еллар сәхнәдән төшмәгән данлыклы спектакльләрне күрә алачаклар.

17 июнь,  18.00 циклны Туфан Миңнуллинның  «Диләфрүз - Remake» музыкаль комедиясе ачып җибәрә. Көннәрдән бер көнне авылның иң чибәр кызы Диләфрүзнең рәсеме төшкән “Рlауbоу” журналы егетләр кулына килеп эләгә... Спектакльнең режиссеры – Фәрит Бикчәнтәев.

19 июнь, 19.00 Тамашачыларның иң яраткан спектакльләренең берсе - Туфан Миңнуллинның “Гөргөри кияуләре”. Әлеге музыкаль комедия 20 елдан артык һәрдаим аншлаглар белән уза. Спектакльнең режиссеры – Марсель Сәлимҗанов.

20 июнь, 19.00 111нче сезон премьерасы – Илдар Юзеев әсәре буенча куелган “Ак калфагым төшердем кулдан” спектакле. Ток-шоу жанрында куелган спектакльдә Казан һәм Америка татарлары арасында корылган телевизион күпер аша, милли үзаң темасына багышланган сораулар күтәрелә. Спектакльнең режиссеры – Фәрит Бикчәнтәев.

21 июнь, 19.00 Фәрит Бикчәнтәев куйган данлыклы спектакль – Нәкый Исәнбәт һәм Саадалла Ваннус әсәрләре буенча “Хуҗа Насретдин”. Баш рольдә – Татарстанның атказанган артисты  Фәнис Җиһанша.

22 июнь, 19.00 “Сөясеңме, сөймисеңме...” спектакле. Баш рольләрдә – Равил Шәрәфиев һәм Дания Нуруллина. Спектакль драматург Флорид Бүләковның якты истәлегенә багышлана.

23 июнь,19.00 Циклны Кәрим Тинчуринның “Зәңгәр шәл” спектакле тәмамлый. Бу очраклы түгел – спектакль күптән татар театрының символына һәм Камал театрының “визит карточкасына” әверелде. Әлеге спектакльгә тамашачыларның мәхәббәте сүрелми, ә пьеса инде күптән легендар спектакль статусын алды. Бу пьеса татар театры сәхнәсендә 1926 елдан бирле уйналып килә.

Г.Камал исемендәге Татар дәүләт Академия театрының барлык спектакльләре дә  рус һәм инглиз теленә синхрон тәрҗемә белән тәэмин ителә. Билетларны театр сайтында kamalteatr.ru һәм касса телефоны буенча сатып алырга мөмкин: (843) 293-03-74.

среда