Бүген Г. Камал исемендәге Татар дәүләт Академия театры һәм Сычуань һөнәри сәнгать көллияте арасында килешүгә кул куелды. Әлеге килешүнең максаты – сәхнә сәнгате өлкәсендә уртак эзләнүләр өчен даими җирлек булдыру. 

Партнерлык кысаларында уртак театраль тамашалар булдыру, алмаш гастрольләр, лекцияләр уздыру өчен осталар чакыру, яшь актерларның белемнәрен күтәрү программалары, академик алмашу һәм мәгариф өлкәсендә хезмәттәшлек кебек төгәл юнәлешләр планлаштырыла.

Килешүгә кул куйганчы, Сычуань көллияте җитәкчелеге һәм остазлары белән иҗади очрашу үткәрелде, ә татар актерлары исә кытайдан килгән хезмәттәшләре белән үзара тәҗрибә уртаклашты.
Чаралар "РОСТКИ: Россия һәм Кытай - үзара файдалы хезмәттәшлек" IV Халыкара форумы кысаларында үткәрелде.