РусТатEng

3 НОЯБРЬДӘ «ТАТАР МӘДӘНИ КОДЫ: БЕРЕНЧЕ ТАТАР ТЕАТРЫНА 110 ЕЛ» КҮРГӘЗМӘСЕ АЧЫЛА

3 ноябрьдә 16 сәгатьтә Татарстан дәүләтчелеге тарихы музеенда ("Казан Кремле" музей-тыюлыгы) "Татар мәдәни коды: Беренче татар театрына 110 ел" дип исемләнгән күргәзмә ачыла. Әлеге күргәзмә Г.Камал исемендәге Татар дәүләт Академия театры белән берлектә оештырыла. Күргәзмәнең ачылу тантанасындаКамал театры актерлары: Россиянең һәм Татарстанның халык артистлары Ринат Таҗетдинов, Әзһәр Шакиров;Россиянең атказанган,Татарстанныңхалык артисткасы Наилә Гәрәева; Татарстанның халык артисткасы Луара Шакирҗан катнашалар.

Күргәзмә профессиональ татар театрының барлыкка килүе, үсүе турында сөйли. Татар театры үзенең 110 еллык тарихында миллионлаган тамашачы мәхәббәтен яүлады, Татарстанның һәм төрки дөньяның мәдәни символына, Җөмһүриятебезнең горурлыгына әверелде. Экспозициядә уникаль архив документлары, спектакль афишалары, буклет һәм програмкалар, костюм һәм декорацияләр эскизлары, фотографияләр, газет-журналлар, танылган артистлар - Сәхибҗәмал Гыйззатуллина-Иделле, Фатыйма Ильская, Кәрим Тинчурин, Хәлил Әбҗәләлов һәм башкаларның - шәхси әйберләре күрсәтеләчәк. 

110 ел әлек, 1906нчы елның 22 декабрендә, Казанда алдынгы фикер йөртүче яшьләр татар телендә беренче спектакльне халык алдында күрсәтте. Ул көннән алып бүгенге хәленә кадәр театр зур юл узды, ул мирасына тугры калды, әмма актуальлеген дә югалтмады, хаман үсеш, алга бару юлында хәрәкәт итә. Сәнгатькә мәхәббәт, туган як мәдәниятенә хөрмәт, театрга чиксез тугрылык барлык авырлыкларны да - Гражданнар сугышы бөлгенлеген, совет цензурасын, 1937нче елгы реперссияләрен, Бөек Ватан сугышын, үзгәртеп кору чорын һәм СССРның җимерелүен - җиңеп чыгырга булышты. Г.Камал исемендәге театр тарихына мөрәҗәгать итү һәр тамашачы өчен Җөмһүриятебезнең тарихы һәм мәдәнияте, илебезнең үзенчәлекле тарихына сәяхәт булыр. 

Татарстан дәүләтчелеге тарихы музееның эш сәгатьләре: 

Сшмб-пнҗшмб, шмб-якш – 10.00 - 18.00 (касса 17.30)

Җмг – 11.00 - 20.00 (касса 19.30)

Телефон: (843) 567-80-85/

Среда 02.11.2016
0
Подпишитесь на рассылку, чтобы быть в курсе новостей театра