РусТатEng

Камаллылар яңа мөгез чыгара яки рус дизайнеры милли театр стилен билгели


Төп текст: http://intertat.ru/tt/madaniyat-tt/item/48265-kamallyilar-ya%D2%A3a-m%D3%A9gez-chyigara-yaki-rus-diz...

Г.Камал исемендәге Татар дәүләт академия театры яңа сезонга шактый зур үзгәрешләр белән аяк басты. Интернет кулланучылар ул үзгәрешләрне тоя башлаганнар иде инде...

Театрның маркетинг һәм PR буенча директор урынбасары булып яңа гына эшли башлаган Илшат Латыйпов матбугат очрашуы үткәрде. 110нчы юбилей сезоны алдыннан Камал театры Татарстан журналистларына яңа фирма стилен тәкъдим итте. Театрның әдәби бүлек мөдире, танылган тәнкыйтьче Нияз Игъламов сүзне ерактан башларга булды. Ул театр афишаларының стиль үсеше тарихын бәян итеп узды. Афишаларга 1920 елларда ук зур әһәмият бирә башлаганнар. Еллар дәвамында, төрле чорда төрле үзгәрешләр була, һәр дәвер милли сәнгатькә үзенчә өлеш кертә.

Мәгълүм булганча, 2 октябрь көнне К.Тинчуринның “Зәңгәр шәл”е белән театр быелгы сезонны ача. Афишага күз салырга өлгергәннәр андагы кискен үзгәрешләргә бәя бирергә өлгергәндер. Театрның элеккеге логотибы урынына өч телдә Камал театры дигән язу театр бинасының түбәсен хәтерләткән рамка эченә алынган. Геометрик фигураларга беркетү уңышлы табыш дип бәяләп буламы икән? Ләкин театрдагылар үзләре исә яңа стиль логотипның тагын башка альтернатив вариантлары булу мөмкинлеген чикләми икән. Төсләр гаммасы да яңартылган. Кызыл, карадан тыш фирәзә төс өстенлек итә.

Басма продукциядә дә, сайтта да яңа - фирәзә, көрән төсләр кулланыла. “Төсләр һәм орнамент мәсьәләсенә килгәндә, монда бернәрсә дә очраклы түгел, - дип ышандыра Игъламов. - Һәр элемент алдан уйланылган, эзләнелгән. Фирәзә төснең үз үзенчәлеге бар. Фирәзә төсендәге Кабан күле, ә күлнең яр буенда кораб сыман Камал театры бинасы “тукталган”.


Мәскәү дизайнеры Наталья Агапова театрның ребрендингын эшләргә бик теләп алынган. Татар театрының яңа фирма стилен эшләгән дизайнерның хезмәте билетларда, сувенир продукциядә, тышкы рекламада һәм хәтта театр бинасы диварларында да кулланылыр, дип планлаштырыла. “Әлеге яңалыклар ярты ел эчендә үзен тулаем сиздерәчәк, - ди театрның директоры Илфир Якупов. - Безнең театр һәрвакыт хәрәкәттә, иҗади эзләнүдә. Йөз елдан артык яшәү дәверендә театрның бер генә дә туктап торганы юк. Шушы еллар эчендә репертуар гына үзгәреп калмады, эчтәлек тә, форма да үзгәрде”.

Театрның сайты да тулысынча яңартылган. Ул яңа сәхифәләр белән баетылган, аның формасы, бизәлешенә дә игътибар итми калмагансыздыр. Интернет-кибеттә “Әлдермештән Әлмәндәр”, “Люстра”, “Ахырзаман”, “Кара чикмән” спектакльләренең язмаларын һәм китаплар, аудиоязмалар һ.б. сатып алу мөмкинлеге булдырылган. Моннан тыш биредә “Нәүрүз”, “Һөнәр” фестивальләрендә, “Яңа татар пьесасы” конкурсында катнашырга теләүчеләр хәзер гаризаларын турыдан-туры сайттан гына җибәрә ала.

Театр, чыннан да, үзгәрешләр кичерә, заманга яраклаша, театрдагылар, тамашачыбыз яшәрә. “Без яшьләргә йөз тотабыз”, - ди театрдагылар. Шулай да татарның атаклы милли театрына русларга ияреп кискен борылышлар кирәкме икән? Геометрик фигураларны мулдан кулланганчы, гарәп имласына нигезләнгән каллиграфик үрнәк кертү отышлырак булмасмы икән?

Татарстанның атказанган сәнгать эшлеклесе, мөгаллим, рәссам-хаттат Нәҗип Нәккашның моннан берничә ел әйтелгән фикере искә төште: “Камал театры бинасына гарәп язуын купшы итеп язып куйсак, нинди урынлы булыр иде. Милли бер үзенчәлек булыр иде, дип уйлыйм. Г.Камал үзе үк заманында үз кулы белән афишалар язган бит... Мең елдан артык кулланылган гарәби язуны 1928 елны Сталин фәрманы белән бетерәләр, бөтен төрки халыкларны бер-берсеннән аеру, ераклаштыру сәясәте белән бетерәләр, чөнки бу язу бөтен төрки мәдәниятен берләштереп торган”.

"Интертат". Мөршидә Кыямова. 03.09.2015г.

0
Подпишитесь на рассылку, чтобы быть в курсе новостей театра