Иртәгә Татарстанның Әтнә районы Түбән Бәрәскә авылы мәдәният йортына ТАССРның Г.Тукай исемендәге премиясе лауреаты, күренекле артист һәм режиссер Рәфкать Әхмәтҗан улы Бикчәнтаев (10.02.1924 21.01.1975) исеме биреләчәк. Шулай ук бу көнне мәдәният йортында Рәфкать Бикчәнтәев истәлегенә багышланган кичә була, анда видеоязмалар, музыкаль номерлар, шигырьләр, истәлекләр һәм спектакльләрдән өзекләр күрсәтеләчәк. Тантанада камаллылар да катнаша.

Артист турында:
Татарстанның Әтнә районы Түбән Бәрәскә авылында туа. Казанда үсә. Казан сәнгать училищесында укый. ГИТИСның актерлык факультетын тәмамлаганнан соң (татар студиясе) 1949 елда Татар яшь тамашачы театрында, аннары 1950 елдан Татар академия театры труппасында эшли. 1961-62 елларда Мәскәүдә югары режиссерлык курсларында укый һәм И.В.Маяковский театрында Н.П.Охлопков җитәкчелегенлә стажировка уза. Камал театрына профессиональ режиссер сыйфатында кайткач, театр белән иҗади хезмәттәшлеккә яшь талантлы драматург Х.Вәхитне җәлеп итә һәм аның «Беренче мәхәббәт», «Рәхим итегез», «Кайда соң син?", "Күк капусы ачылса" пьесаларын сәхнәләштерә. Ул шулай ук Казан театр училищесында укыта.
1971-1975 елларда Республика күчмә театры режиссеры (бүгенге көндә К.Тинчурин исемендәге театр).
1960 елда Г.Тукай исемендәге Дәүләт премиясе лауреаты.
Яңалыкка омтылучан, якты карашлы, талантлы, үткен характерлы артист.