Бүген Камал театры җитәкчелеге һәм артистлары Башкортстан башкаласы Уфада булды. Иртә белән театр директоры Илфир Якупов, РФ һәм ТРның халык артисты Әзһәр Шакиров, ТРның атказанган артисты Ришат Әхмәдуллин иртәнге тв-тапшыруларда театрның киләчәк гастрольләре турында сөйләделәр (9-16 ноябрь).

Көндез медиа-үзәктә матбугат конференциясе узды. Шулай ук Камал театры, М.Гафури башкорт һәм "Нур" татар театры директорлары, Башкортстан мәдәният министры Әминә Шәфикова белән очрашып, иҗади планнар турында фикер алыштылар. Кич белән камаллылар РФ, ТР, БР халык артисткасы Нурия Исаеваны юбилее белән котлый.