Бүген, 9 гыйнварда, Г.Камал исемендәге Татар дәүләт Академия театры (Казан ш.) Мәскәүгә традицион гастрольләргә китә. 2019 елның 11-16 гыйнварында Россиянең Малый дәүләт академия театры сәхнәсендә Камаллылар соңгы еллардагы 5 премьераны тәкъдим итәчәк. Мәскәү белән Казан арасында алмаш гастрольләр традициясе 2006 елдан бирле дәвам итә. Гастрольләрдә Камал театрының 100дән артык хезмәткәре катнаша: артистлар, административ һәм техник хезмәткәрләр. 

Гастрольләр 11 гыйнварда режиссёр Фәрит Бикчәнтәевның беренче мәртәбә ток-шоу жанрында Ильдар Юзеев пьесасы буенча куйган  "Ак калфагым төшердем кулдан" спектакле белән ачыла. Гастрольләр афишасында, шулай ук, Фәрит Бикчәнтәев сәхнәләштергән Аяз Гыйләҗев пьесасы буенча "Әтәч менгән читәнгә", Зөлфәт Хәким пьесасы буенча "Килә ява, килә ява..." һәм Нәкый Исәнбәт  пьесасы буенча Илгиз Зәйниев сәхнәләштергән "Миркәй белән Айсылу", Гаяз Исхакый әсәрләре буенча Айдар Җаббаров куйган "Тормышмы бу?.." спектакльләре бар. 

«Мәскәү гастрольләре өчен без, традиция буенча, соңгы ике елның премьераларын сайлап алдык. Нигездә алар милли классикларыбызның әсәрләре буенча куелган спектакльләр. Шуны да әйтеп үтү мөһим: гастрольләр Россия һәм Татарстан мәдәният министрлыклары ярдәме белән үткәрелә», – ди Камал театры директоры Илфир Якупов. 

Гастроль кысаларында, А.А. Бахрушин исемендәге театр музеенда 12 гыйнвардан "Марсель Сәлимҗанов театры" дигән күргәзмә эшли башлаячак. Күргәзмә театр режиссеры, СССРның халык артисты Марсель Сәлимжановның (1934-2002) тормыш һәм иҗат юлына багышлана. 2019 елда режиссерга 85 яшь тулган булыр иде. Күргәзмәдә Марсель Сәлимҗанов куйган спектакльләрдән фотосурәтләр, костюмнар, реквизитлар, шулай ук, режиссерның шәхси архивыннан фотолар, видеоязмалар  тәкъдим ителә.  

Гастрольләр Малый театрның филиал бинасында үтә. Адресы - Зур Ордынка 69 йорт, метро - Добрынинская тукталышы. Касса телефоны: (495) 624 40 46, (499) 237 31 81. Г.Камал исемендәге Татар дәүләт Академия театрының Мәскәү гастрольләренә билетларны театр сайтының "Афиша" бүлегендә алырга мөмкин.