10, 11, 12, 30 апрель һәм 1 май көннәрендә Камал театрының Зур залында Туфан Миңнуллинның легендар "Әлдермештән Әлмәндәр" спектакле премьерасы. Спектакльнең режиссеры - театрның сәнгать җитәкчесе Илгиз Зәйниев. Рәссам – Сергей Скоморохов, хореограф – Сәлимә Әминова, композитор – Алмаз Монасыйпов.

Әлдермеш авылында яшәүче 91 яшьлек Әлмәндәр карт турында яше дә, карты да белә. Ул, олы яшьтә булуына карамастан, бу фани дөньяны бернинди сылтау белән дә ташлап китәргә җыенмый һәм үзе артыннан күктән төшкән Әҗәлгә дә бу хакта кистереп әйтә. Аның бу җирдә әле эшләре бик күп: дачасын төзеп бетерәсе, балаларын, оныкларын һәм оныкчыкларын карыйсы, үстерәсе һәм өйләнәсе бар...

Татар театры өчен легендар булган, Марсель Сәлимҗанов куелышында 33 ел (1976-2009) сәхнәдә яшәгән Әлдермештән Әлмәндәр спектакльнең авторы Туфан Миңнуллин үзе әйткәнчә, шат күңелле карт образы аңа «каяндыр балачак хатирәләреннән» килгән. Драматург Әлмәндәр карт образын балачагындагы аксакалларга охшатып тудырган: ул шундый ук зирәк, ихлас һәм үлемнән курыкмый торган.

Данлыклы Әлмәндәр образы әнә шулай туа... Ә спектакль бер мизгелдә хитка әверелә һәм авторларга, башкаручыларга Дәүләт премияләрен генә түгел, ә чын халык мәхәббәтен дә китерә.
Легендар текстны яңадан сәхнәләштерү үткәннәрне искә төшерү генә түгел, ә театрның киләчәгенә хәзерге заманнан караш та булачак... Яңа спектакль зирәклек һәм рухи гармония хакында бәян итәчәк. Җирдә игелек һәм яктылык явызлыктан, бәхетсезлекләрдән һәм ялгышлардан күбрәк булсын өчен һәркем әлеге кыйммәтләргә омтылырга тиеш.