6 октябрьдә Казанда республикакүләм «Кино+Театр» дигән уникаль акция старт ала. Әлеге чараны «Татаркино» мәдәният учреждениесе Г.Камал исемендәге Татар дәүләт Академия театры белән берлектә Россиядә театр елы кысаларында оештыра.

Берничә ай дәвамында һәр якшәмбе 14:00 сәгатьтә «Мир» кинотеатрында Камал театрының репертуардан төшкән иң яхшы спектакльләре күрсәтеләчәк. Тик бу спектакль күрсәтү генә булып калмыйча, тамашачылар Камал театры артистлары белән дә очрашып аралашачак.

«Кино+Театр» проекты ярдәмендә Татарстанның горурлыгына әверелгән спектакльләр беренче тапкыр зур экранда күрсәтеләчәк.

«Бу идея инде ел башында, Россиядә Театр елы игълан ителүгә үк туган иде. Безнең инде Театр елы белән бәйле рус телендә берничә акция булды - «Мир» кинотеатрында, шулай ук, республиканың кайбер районнарында, төгәлрәк әйтсәк, Питрәч һәм Лаешта. Анда бүген дә драматик материалны кулланып чаралар үткәрелә. Ягъни, артистлар сәхнәдән әсәрне укый һәм спектакльдән өзекләр уйный, ә киноэкран декорация буларак хезмәт итә», - дип сөйләде «Татаркино» директоры Миләүшә Айтуганова.

Шул исәптән татар телендә дә спектакльләр күрсәтү идеясе килеп туа һәм «Татаркино»  Камал театрына тәкъдим белән чыга. Нәтиҗәдә, театр зур экранда күрсәтү өчен видеоязмадагы легендар спектакльләрен «Татаркино»га тапшыра. 

«Әлегә без 8 спектакльне сайлап алдык, алар татар телендә рус теленә субтитрлар белән», - диде Айтуганова.

«Безнең, спектакльләрне видеоязмада күрсәтеп, фикер алышу тәҗрибәсе инде бар. Театр тамашачысы өчен оештырылган "Камал мәктәбе" проекты һәм ачык һавада Кабан буенда язмаларны күрсәтү. Менә хәзер әлеге язмалар зур экранда 200 кеше сыешлы залда курсәтелә башлаячак. Мондый проектлар тамашачы өчен бик кирәк, чөнки аларның һәрвакыт архив спектакльләрен карау мөмкинлеге юк. Ә репертуардан төшкән спектакльләр белән, чыннан да, бик нык кызыксыналар. «Кино+Театр» проекты тамашачыларга яңадан аларны күрү бәхетен тудырачак», - диде Г.Камал исемендәге ТДАТ директоры Илфир Якупов.

«Кино+Театр» проекты Казанда гына түгел, гомумән, республикакүләм оештырылыр дип планлаштырыла. Якын арада кайсы район-шәһәрләрдә күрсәтеләчәге билгеле булачак.

Билет бәясе барлык сеансларга да 150 сум.

Проект Казанда 6 октябрьдә  Туфан Миңнуллин әсәре буенча Марсель Сәлимҗанов сәхнәләштергән «Әлдермештән Әлмәндәр» спектакле белән ачыла, 1976 ел.

"ТАТАРКИНО" матбугат үзәге, Г.Камал театры матбугат үзәге белән берлектә