27 апрель 18.00 сәгатьтә Камал театрының Кече сәхнәсендә "Камал мәктәбе" театр тамашачысы мәктәбенең 7нче дәресе уза. Тамашачыларга "Кара чикмән" спектакленең (2002 ел) видеоязмасы күрсәтелә. Авторы - Геор Хугаев, режиссеры- Фәрит Бикчәнтәев.

"Кара чикмән"нең куелыш тарихы да фабуласы кебек кызыклы. Аның авторы Осетия драматургы Георг Хугаев, Марсель Сәлимҗановның дусты, Камал театрына үзенең комедияләренең берсен куярга тәкъдим итә, ә Марсель Хәкимович драма сайлый, ләкин эшен башларга өлгерми. 2002 елның мартында ул вафат була. Шушы ук елның 7 ноябрендә, Марсель Хәкимовичның туган көнендә, әлеге спектакльне аның укучысы - театрның яңа баш режиссеры Фәрит Бикчәнтәев тәкъдим итә.

Спектакльнең төп геройлары "Ахырзаман"дагы кебек - хайваннар. Баш герой - Түзәр исемле эт ана бүре Чибәрнең сихеренә бирелмичә хуҗасының чикмәнен саклый. Кызганычка каршы, хуҗасы килгәч, аны атып үтерәчәк, чөнки эт ачлыктан бөтерешеп, эшкә ярамас хәлгә килгән. Әлеге спектакль эчкерсез тугрылык һәм чын кешелеклек турында.

Олег Николаев хореографиясе ("Норд-Ост" мюзиклы"), Мәсгүдә Шәмсетдинова музыкасы һәм Юрий Чаплин аранжировкалары, Сергей Скоморохов сценографиясе, Людмила Волкова костюмнары, Юныс Сафиуллин тәрҗемәсе, Илтөзәр Мөхәммәтгалиев җыр текстлары - боларның барысы да тамашачы күңелен яулау өчен оешканнар диярсең. Спектакльдә уйнаган яшь актерлар - Искәндәр Хәйруллин, Люция Хәмитова, Радик Бариев, Ләйсән Рәхимова, Алмаз Гәрәев - хәзерге вакытта театрның әйдәп баручы актерлары. Һәм, асылда, спектакльне алга таба да күрсәтергә берни дә комачауламас иде. "Кара чикмән" сәхнәдән әле гөрләп барган чагында төште – соңгы спектакль 2013 елның 6 маенда уйналды. Ул вакытка спектакль Төрки халыкларның VIII "Нәүрүз" Халыкара театр фестиваленең Гран-при бүләгенә, II Бөтенроссия "Музыкальное сердце театра" фестиваленең өч премиясенә (Гран-при, иң яхшы режиссура, иң яхшы актер) һәм XIII "Белая вежа" Халыкара театр фестиваленең (Брест, 2008) Гран-при һәм иң яхшы ир-ат роле бүләгенә лаек булырга өлгергән иде.

БИЛЕТ АЛЫРГА
КАССА: (843) 293-03-74