Питрәчтә Айдар Хафизов исемендәге театр марафоны узды
Пәнҗешәмбе 02.12.2021
22 ноябрьдән 27 ноябрьгә кадәр Питрәчтә «Театр атналыгы-2021» узды. Үзешчән театр коллективларының III район марафоны Питрәчлеләрнең күренекле якташы - ТР халык артисты, РФ атказанган артисты Айдар Хафизов исеме астында үтте. Театр фестивален Питрәч муниципаль районы мәдәният бүлеге оештырды.Район мәдәният йорты сәхнәсендә алты үзешчән театрның спектакльләре күрсәтелде. Марафонны Айдар Хафизовның Туган авылыннан килгән коллектив ачты. «Хәят» һәвәскәрләр театры Туфан Миңнуллинның «Әниләр һәм бәбиләр»пьесасы буенча спектакль тәкъдим итте. Шулай ук, «Сәләт» (Кибәк авыл мәдәният йорты), «Шәле Таңнары» (Шәле авыл мәдәният йорты), «Мирас» (Отар-Дубровка авыл мәдәният йорты) үзешчән коллективлары спектакльләр күрсәтте.
Марафонның танылган артист исеме астында оештырылуы очраклы түгел. Билгеле булганча, Айдар Хафизов үзенең иҗади юлын Казанның Ленин исемендәге Мәдәният сараенда режиссер буларак башлап җибәрде. Айдар Хафизов куелышындагы спектакльләр театр смотрларында һәм фестивальләрдә һәрвакыт призлы урыннар яулады. Аның җитәкчелегендә үзешчән труппада артистлары соңрак Камал театры труппасы составына керә. Алар: Мансур Ибраһимов, Харис Төхвәтуллин, Илсөяр Фазылҗанова. Айдар Хафизовның театр дәресләренә трамвай йөртүче Гасиман Ширгазин да йөри, соңыннан ул профессиональ телевидение режиссеры булып китә һәм күп еллар Татарстан ДТРКда эшли.
Фестивальне «Балкыш» халык театры куелышында «Үз хатыныма өйләнәм»(Н.Гаитбаев) комедиясе тәмамлады. Төп рольләрнең берсен танылган артист Салават Фәтхетдиновның укучысы башкарды. Салават Фәтхетдинов исә, фестивальдә катнашучыларның барысына да кыйммәтле бүләкләр алып килгән иде. Чыгыш ясаган вакытта ул Айдар Хафизов исемендәге халык театры оештырырга тәкъдим итте, «Ул моңа, һичшиксез, лаек", - диде.
Бу фикерне «Татмедиа» АҖ җитәкчесе Шамил Садыйков та хуплады. Ул да Айдар Хафизовны үзенең укытучысы дип саный. Билгеле булганча, хәзерге медиа-холдинг җитәкчесе Шамил Садыйковның журналист карьерасы «Эфир» телекомпаниясенең «Адымнар» программасында старт ала. Ул вакытта программаның режиссеры Айдар Хафизов була. Фестивальне ябу тантанасы артистның хатыны һәм кызы Фәридә һәм Айсылу Хафизовлар, хезмәттәшләре Әзһәр Шакиров һәм Раушания Юкачева, язучы, депутат Ркаил Зәйдулла, шагыйрь Рүзәл Мөхәммәтшин һәм башка татар зыялылары катнашында узды.
