Оркестр

Профессиональ татар драма театры беренче көннәреннән үк музыка белән тыгыз бәйләнештә иҗат итә һәм татар профессиональ музыкасының формалашуына һәм үсешенә үз өлешен кертә.

Г.Камал исемендәге Татар дәүләт Академия театры оркестрын 1922 елда татар профессиональ музыкасына нигез салучыларның берсе, композитор, ТАССРның халык артисты Салих Сәйдәшев оештыра. Татар театрларыннан бары тик Г.Камал исемендәге театр гына составы һәм уен кораллары саны буенча симфоник оркестрга якын даими оркестрга ия була. 1948 елда, сугыштан соңгы чорның авыр икътисадый хәле белән бәйле рәвештә, республиканың барлык театрларында да штатлар кыскартыла. Шул исәптән Камал театры оркестры да таратыла һәм, нәтиҗәдә, Сәйдәшев эшеннән китә. 1953 елда театр Сара Садыйкованы музыка бүлеге мөдире һәм концертмейстер вазифасына чакыра һәм аңа композиторлык иҗатына юл ача. 1955 елда Садыйкованы 1957 елгы Татар сәнгате һәм әдәбияты декадасының барлык музыкаль спектакльләрен әзерләп чыгарган Б.Мөлеков алмаштыра. Әлеге спектакльләр белән бергә сәхнәгә оркестр һәм көтелгән «Зәңгәр шәл» музыкаль драмасы да әйләнеп кайта. 1969 елдан 2021 елга кадәр, ярты гасырдан артык, оркестрны дирижер, композитор Фуат Әбүбәкеров җитәкли. Хәзерге вакытта Камал театры оркестрының сәнгать җитәкчесе һәм баш дирижеры Данияр Мнир улы Соколов. 2021 елдан башлап, театр спектакльләре белән беррәттән, оркестр актив концерт эшчәнлеге алып бара. Оркестр үзенең концертлары белән Казан, Мәскәү, Яр Чаллы, Түбән Кама һ.б. шәһәрләрдә; даими рәвештә башкалабызның С.Сәйдәшев исемендәге Зур залында, Казан ратушасында чыгышлар ясый. Аның репертуарында татар музыкасы классиклары, хәзерге заман композиторлары, рус һәм дөньякүләм композиторлар мәктәбе композиторлары әсәрләре бар. Драма театры һәм Симфоник оркестрның бергәлеге татар классик спектакльләре музыкасының уникаль архив материалларын торгызырга мөмкинлек бирде.