Кичә, Халыкара музейлар көнендә, Татарстанның Биектау районы Ибрә авылында бөек татар композиторы, татар профессиональ музыка сәнгатенә нигез салучы Салих Сәйдәшевнең музее ачылды. 
Чарада Камал театры артистлары катнашты: Татарстанның халык артистлары Фуат Әбүбәкеров һәм Татарстанның атказанган артисты Әхмәт Кәримов бөек композиторның җырларын башкардылар, Татарстанның халык артисткасы Луара Шакирҗанова нәфис сүз белән чыгыш ясады, ә театрның яшь актерлары Ришат Әхмәдуллин һәм Гүзәл Гөлвердиева К.Тинчуринның "Зәңгәр шәл" спектакленнән өзекләр күрсәттеләр.