Бүген М.Сәлимҗанов исемендәге Актерлар йортында Татарстан Республикасы Театр эшлеклеләре берлегенең VIII (ХХII) Отчет-сайлау Съезды узды. Оешма җитәкчеләре һәм делегатлар соңгы 5 елга нәтиҗә ясадылар. Бүгенге көндә ТР Театр эшлеклеләре берлеге Россия театр эшлеклеләре берлегенең иң зур бүлеге булып тора. Берлектә мәдәният, сәнгать эшлеклеләреннән торган 565 әгъза бар.
Союз рәисе, Г. Камал театрының баш режиссеры Фәрит Бикчәнтәев союз эшчәнлеге, оешма оештырган иҗади һәм иҗтимагый проектлар турында доклад белән чыгыш ясады.
Берлекнең эшчәнлегенә уңай бәя биреп, делегатлар яңа җитәкчелекне сайлауга керештеләр. Рәислеккә бердәнбер кандидат Бикчәнтәев булды. Яшерен тавыш бирү нәтиҗәсе буенча 90 "уңай" тавышка 1 "каршы" тавыш исәбе белән 2011 елдан бирле оешманы җитәкләгән Фәрит Бикчәнтәев Театр эшлеклеләре берлеге рәисе итеп яңа 5-еллык срокка сайланды.