Октябрь башында Төркия дәүләт театрында (Анкара шәһәре) Г. Камал театрының баш режиссеры Фәрит Бикчәнтәев куелышында "Гонзагоны үтерү" спектакленең премьерасы була.
Болгар драматургы Недялко Йорданов пьесасы буенча әлеге яңа спектакль 6 октябрьдә күрсәтеләчәк. Спектакльнең сценографы Г.Камал театрының баш рәссамы Сергей Скоморохов.

"Репетицияләр август аенда ук башланды. Монда артистлар искиткеч: режиссерны тыңлый беләләр, экспериментлар ясарга әзерләр. Тәрҗемәче белән эшләсәк тә, бер-беребезне нигездә аңлыйбыз. Сергей Геннадьевич бик кызыклы визуаль образ тәкъдим итте: кайбер костюмнар, мәсәлән, граффити стилендә ясалачак. Эш ахырына якынлаша, спектаклебез озак яшәр дип өметләнәм. Бәлки әле икенче елга "Нәүрүз" фестивалендә Казан тамашачысына да күрсәтү мөмкинлеге булыр", - диде Фәрит Бикчәнтәев.