Кичә, 15 майда, Санкт-Петербург ТАСС мәгълүмат агентлыгының матбугат үзәгендә Россиядә үтәчәк Халыкара театр олимпиадасы 2019га багышланган беренче матбугат конференциясе узды. Конференциядә Россия Федерациясе мәдәният министрының урынбасары Алла Манилова, Александринский театрының сәнгать җитәкчесе, Халыкара театр олимпиадасының оештыру комитеты әгъзасы Валерий Владимирович Фокин һәм Санкт-Петербургның вице-губернаторы Владимир Владимирович Кириллов. Матбугат конференциясендә видео элемтә буенча да катнашучылар: Г.Камал исемендәге Татар дәүләт Академия театрының баш режиссеры Фәрит Бикчәнтәев, Театр олимпиадасы Халыкара комитеты рәисе Теодорос Терзопулос, композитор, режиссер, педагог Хайнер Гёббельс (Германия), режиссер, Театр олимпиадасы Халыкара комитеты әгъзасы Роберт Уилсон (АКШ).

«Спектакльләрне сайлап алганда төп критерий милли әдәбият һәм драматургия булды. Һәр спектакльне милли режиссерлар куйган, ә артистларның эше милли театр мәктәпләре үзенчәлекләрен чагылдыра. Нигездә без географик яктан Россияне тулысынча колачларга тырыштык. Программага Себер, Ерак Көнчыгыш, Кавказ һәм Идел буе милли театрлары кертелгән. Миңа калса, бу зур театр бәйрәме булачак», - дип сөйләде матбугат конференциясендә Фәрит Бикчәнтәев.

Алданрак билгеле булганча, 2019 елның 11 һәм 12 октябрендә Г.Камал исемендәге Татар дәүләт Академия театры (Казан ш.) Театр олимпиадасында Россия милли театрлары программасын ачып җибәрәчәк. Тамашачылар Камал театрының баш режиссеры, Россиянең һәм Татарстанның атказанган сәнгать эшлеклесе Фәрит Бикчәнтәевнең Аяз Гыйләҗев пьесасы буенча куелган "Әтәч менгән читәнгә" спектаклен күрә алачак. Спектакль Александринский театры (Санкт-Петербург ш.) сәхнәсендә уйнала.

Театр олимпиадасы 2019 — зур фестиваль - төрле илләрдән килгән театр эшлеклеләренең аралашу, тәҗрибә уртаклашу мәйданы. Фестиваль кысаларында иң яхшы чит ил театрларының, Россия милли театрларының гастрольләре һәм әйдәп баручы театр эшлеклеләренең мастер-класслары үтә. Санкт-Петербургта үтәчәк Олимпиадада 15 илдән килгән театрлар 30дан артык спектакль тәкъдим итәчәк. Камал театрыннан тыш милли театрлар программасында Бурятия, Якутии, Чечня, Карелия һәм Башкортостан театрлары бар.