7, 8, һәм 9 ноябрьдә Камал театрында Александр Володин пьесасы буенча "Санаулы кичләр" спектакленең премьерасы була. Спектакльнең режиссеры - Айдар Җаббаров, рәссамы - Булат Ибраһимов, хореограф - Олег Глушков, ут буенча рәссам - Ольга Окулова, тәрҗемә - Резеда Гобәева. 

«Бу вакыйга кешеләр турында, шуңа да әлеге пьесаны сайладык. Беренче карашка тарихи вакытка бик бәйле кебек тоелса да, ул беркайчан да үзенең актуальлеген югалтмаячак. Ир үткәненә кайтырга омтыла, инде дөньяда булмаган нәрсәнедер кабат терелтергә, ә хатын-кыз аны көтә... Бар да гади генә кебек, тик бу гадилекне гәүдәләндерү бик катлаулы. Күңелгә үтеп керә торган, дулкынландыргыч спектакль туар дип уйлыйбыз».

Әлеге вакыйга 50нче елларның икенче яртысында була, - дип тә өстәргә мөмкин. Пьеса сугыш һәм блокада, репрессия турындагы яралы истәлекләр белән сугарылган, ул яралар төп геройны да читләтеп үтми. “Сугышка кадәр монда минем беренче мәхәббәтем яши иде”, - ди беренче сәхнәдә Ильин. “Сугыш кына була күрмәсен”, - дип тәкрарлый финалда Тамара. Әлеге конкрет тарихи вакыйгага бәйлелек XXI гасырның яшь режиссерларын куркытырга, аптырашта калдырырга тиештер кебек. Тик режиссер Айдар Җаббаров башкача уйлый. Аның өчен бу вакыйга аерым чорга бәйләнмәгән, ул - үзен көтүче Хатын-кыз янына кайткан Ир-ат хакында.