Шамил Закиров рухына Камал театры сәхнәсеннән Коръән укылып дога кылынды. Коръән укырга Мансур хәзрәт Җәләлетдинов чакырылган иде. Театрда аның элеккеге директорын искә алу кичәсе узды. Кичә Татарстанның һәм Россиянең атказанган мәдәният хезмәткәре Шамил Закировның (1945-2012) 75 ел тулуга багышланган иде.
Мансур хәзрәт Коръән укыр алдыннан Шамил Закиров белән аралашып яшәүләрен әйтте. Ул аның Коръән китаплары җыюын һәм аларны музейга бүләк итүен ассызыклады. «Ул Салават концертларының рамазан аена туры килгән вакытында киңәш сорап килгән иде. Мин тәнәфесне кояш баткан вакытка туры китерергә киңәш иттем», — дип искә төшерде ул.
«Шамил Закиров комсомол комитетында эшләгәндә мин комсомолга ышана башладым. Яшьләр өчен кайгырта иде. Миннән яшьләр өчен җыр яздыртты, пьеса яздыртты. „Әйдә, барыйк, кызлар карыйк“ дигән ул спектакль Тинчурин театрында бик уңышлы барды», — дип истәлекләре белән уртаклашты Разил Вәлиев.
Кичәне Камал театры музее мөдире Луара Шакирҗанова алып барды. Искә алу кичәсендә Салават Фәтхетдинов да катнашты.
Рузилә Мөхәммәтова, "Татар-информ"
