Татарстанның атказанган артисты Рамил Вәҗиевның 50 яшьлек юбилеена Камал театры Ркаил Зәйдулланың «Игезәк» спектаклен күрсәтте.

Башта Казан шәһәре башкарма комитеты җитәкчесе урынбасары Гүзәл Сәгыйтовадан, Татарстанның халык шагыйре, ТР Дәүләт Советы депутаты Ркаил Зәйдулладан, «Живой город» мәдәниятне үстерү фонды җитәкчеләре Диана Сәфәрова һәм Инна Ярковадан, шулай ук курсташларыннан котлаулар кабул иткән артист, спектакль дәвамында сәхнәдә уйнады.

«Фәрит Бикчәнтәевның бу легендар төркеменә шул кадәр хөрмәтем зур – аларның һәрберсенә абый-апа дип дәшәм. Рамил Вәҗиев минем өчен беренче чиратта Камал театрының көр, яңгыравыклы тавышы. Аңа Ходай буй-сынны да, тавышны да, талантны да биргән. Мин сезгә бәхетле очракларның күбрәк булуын телим», - диде Гүзәл Сәгыйтова.

«Сез безнең фонд проектларында ун ел дәвамында – фонд эшли башлаганнан бирле катнашасыз. Без сезгә бик рәхмәтле. Миңа режиссер буларак, «Анна Каренина» спектаклендә сезнең кебек бөек артист белән эшләве искиткеч иде. Без сезне бик яратабыз», - диде Диана Сәфәрова.

Халык шагыйре Ркаил Зәйдулла күпьеллык нәтиҗәле хезмәте өчен Рамил Вәҗиевка Татарстан Республикасы Рәисенең «Рәхмәт сүзе»н тапшырды. «Берәү әйткән: «Артистны роль бирмичә генә үтереп була», дигән. Рамил бүген төп рольдә сезнең хозурыгызда», - диде ул.

Ркаил Зәйдулла бүген «Һөнәр» яшь режиссура фестивале башлануын искәртеп, оештыручылар исеменнән «Игезәк» спектакле режиссеры Рамил Гәрәевка фестиваль символын тапшырды.

Рамил Вәҗиевның курсташлары – Камал театры артистлары Миләүшә Шәйхетдинова, Илтөзәр Мөхәммәтгалиев, Искәндәр Хәйруллин, Радик Бариев, Фәнис Җиһанша, Әлмәт театры артисты Наилә Нәҗипова «Җанкисәккәем» спектакле форматында шигырьләр белән котладылар. 1995 елда Туфан Миңнуллин пьесасы буенча куелып әлегәчә барган «Җанкисәккәем» лирик комедиясендә Рамил Вәҗиев баш Шүрәлене уйный.

Татар-информ. Рүзилә Мөхәммәтова.