Кичә, 21 февральдә, Г.Камал исемендәге Татар дәүләт Академия театрында Казан (Идел буе) Федераль Университеты һәм Камал театры тарафыннан оештырылган педагогик лаборатория ачылды. Лаборатория кысаларында театр һәм мәгариф структураларының хезмәттәшлек тәҗрибәсен анализлауга багышланган "Театраль педагогика алымнары ярдәмендә укытучыларны һөнәри-этик әзерләү" Халыкара фәнни-методик семинары узды.

Семинарның максаты - драматик сәнгать өлкәсендә хәбәрдар, театр элементларын көндәлек эш практикасында куллана алган педагоглар тәрбияләү. Лабораториядә Г.Камал исемендәге ТДАТ хезмәткәрләре, КФУ мөгаллимнәре, белем бирү учреждениеләре директорларының чыгышлары булачак. Барлыгы чарада 500дән артык район (шәһәр) белем бирү бүлекләренең методик хезмәт җитәкчеләре, лицейлар, гимназияләр, мәктәп директорлары, педагог-оештыручылар катнашты.

“Без әле нинди бөек эпохада яшәвебезне аңламыйбыз. Без бүгенге яшь буынны ачуланабыз. Ә бит алар башка эпоха кешеләре. Сез – укытучылар һәм без – театр – киләчәк кешесен тәрбияләүчеләр. Безнең миссия - эстетик тәрбия миссиясе, - дип башлады сүзен Нияз Игъламов. - Безгә ешрак аралашырга кирәк. Чөнки без алдагы буынны тәрбияләү эшендә җаваплы. Әлеге очрашуыбыз - перспективалы эш. Без сез теләгән очрашуларны ясый алабыз”. 
“Театрдан классик әсәрләрнең элеккеге классик куелышын көтмәгез. Хәзер ритмнар башка. Спектакльләрнең 8.30 башланып, төн уртасында гына бетә торган чаклары булган. Хәзер спектакль бик сирәк очракта 3 сәгать бара. Күп дигәне - 2 сәгать тә 20 яки 40 минут. Классика нигә һаман актуальлеген югалтмый? Чөнки аңа режиссерлар, рәссам, композитор һәм артистлар бүгенгене өсти”, - дип бүгенге театр реальлеге буенча дәресләр бирде Нияз Игъламов.
Кич укытучылар Камал театрында "Әрем исе" спектаклен карадылар.