Кичә, Халыкара театр көнендә, Г.Камал исемендәге Татар дәүләт Академия театры уникаль акция үткәрде.  24 сәгать дәвамында театр сайтында kamalteatr.ru 113нче сезон спектакльләренә билетлар 70%ка кадәр ташлама белән сатылды. Ташлама сезон ахырына кадәр булган репертуардагы барлык спектакльләргә дә каралган иде (14 июнь 2019 ел).

Кичә көн дәвамында 9000нән артык билет сатылды. Сайтка керүчеләр саны 15000нән артып китте. Камал театры мондый акцияны өченче мәртәбә үткәрә. 2017 елда Театр көнендә 1130 билет сатылган, 2018 елда - 1776.

«Башка елларда без билетларны 25% ташлама белән сатсак, бу юлы ташламалар 10%тан 70%ка кадәр иде. Һәм бу бик көчле нәтиҗә бирде - узган ел белән чагыштырганда 6 тапкырга күбрәк билет сатылды, - ди Камал театры директоры Илфир Якупов. – Билет алган  2263 тамашачының 1074е яңа тамашачылар булу безнең өчен бигрәк тә сөенечле. Ягъни кичә билет алучыларның яртысы Камал театрына беренче тапкыр билет алдылар. Мондый акциялар ярдәмендә театрга яшь тамашачылар килә - безнең өчен бу зур шатлык».