Кичә, 18 июньдә, Оренбургта Г.Камал исемендәге Татар дәүләт Академия театры Г.Исхакый әсәрләре буенча режиссер Айдар Җаббаров сәхнәләштергән "Тормышмы бу?.." спектаклен тәкъдим итте. Спектакль М.Горький исемендәге Оренбург дәүләт драма театры сәхнәсендә XI "Гостиный двор" Халыкара театр фестивале кысаларында күрсәтелде. 

Фикер алышуда фестивальнең Андрей Ястребов җитәкчелегендәге барлык тәнкыйтьчеләре дә катнашты.

Айсылу Сагыйтова Искәндәр Хәйруллинның герое спектакль дәвамында бунтарь, беркатлы баладан басынкы мещанга әверелү юлын үтүен әйтте.
Алла Шевелёва әсәрне А.Чеховның хыял, мещанлык, торгынлык һәм прогресс темалары кузгатылган пьесалары белән чагыштырды. 
Екатерина Морозова, спектакльдә геройның күбрәк читтән күзәтүче булуы, тормышын үзе кормавына басым ясады. "Шуңа да куелган сорауның фәлсәфи тирәнлеге геройның үткән юлы белән тәңгәл килми. Спектакль куйган сорау тамашачыларга үз тормышлары турында уйланырга этәргеч бирә", - диде тәнкыйтьче.
Нина Карпова Искәндәр Хәйруллинның әлеге роле бу театраль сезонда иң яхшысы дип саный. 
Андрей Ястребов спектакльдә Чехов поэтикасын тойган һәм аның киләчәге уңышлы дип саный. "Казаннан килгән кунакларыбызга яхшы спектакль өчен рәхмәт!" - диде ул.

Исегезгә төшерәбез, күптән түгел "Тормышмы бу?" спектакле өч халыкара фестивальдә катнашкан иде: Уфа шәһәрендә "Туганлык", Санкт-Петербургта "Радуга", һәм Казанда "Нәүрүз" фестивальләрендә.