24 майда Уфа шәһәрендә Г.Камал исемендәге Татар дәүләт Академия театры Г.Исхакый әсәрләре буенча Айдар Җаббаров сәхнәләштергән "Тормышмы бу?"спектаклен уйный. Спектакль М.Гафури исемендәге Башкорт академия драма театры сәхнәсендә Төрки телле театрларның VII "Туганлык" Халыкара фестивале кысаларында күрсәтелә.  Фестиваль афишасында, шулай ук, Төркия, Әзербәйҗан, Казахстан, Үзбәкстан, Тыва, Крым, Хакасия, Алтай, Гагаузия һәм Башкортстан театрлары бар. 

"Туганлык" фестиваленнән тыш, "Тормышмы бу?" спектакле якын арада өч халыкара фестивальдә катнашачак: Санкт-Петербургта - "Радуга", Казанда - "Нәүрүз", Оренбургта - "Гостиный двор".

Спектакльнең режиссер концепциясе татар сәхнәсе өчен яңа булган этюд ысулын куллануны күздә тота. Инсценировканы һәм рольләрне иҗат иткәндә әсәрдән диалоглар гына түгел, шулай ук авторның фикерләре дә, табигатьнең һәм геройларның бер-берсенә мөнәсәбәтләренең тасвирламалары да үзгәртелмичә алынды. Димәк, Г.Исхакыйның аллюзияләргә һәм метафораларга бай теле тамашачыга тулысы белән бар көчендә барып ирешәчәк.

Спектакль "Алтын битлек" премиясенә 6 номинациядә җиңүгә дәгъвә итте:

«Зур формадагы иң яхшы спектакль»

«Иң яхшы режиссер эше" - Айдар Җаббаров.

«Икенче пландагы иң яхшы хатын-кыз роле" - Ләйсән Рәхимова, Хәлимнең әнисе Мәрзия.

«Иң яхшы ир-ат роле» - Искәндәр Хәйруллин, Хәлим

«Рәссам эше» - Булат Ибраһимов

«Ут буенча рәссам эше» - Ольга Окулова