Г.Камал исемендәге Татар дәүләт Академия театры "Татарча диктант" Бөтендөнья белем тикшерү акциясендә катнашты. Бүген 11 сәгатьтә, онлайн режимда артистлар, цехларда эшләүчеләр, театр администрациясе хезмәткәрләре татар телендә диктант яздылар. Язучы Ибраһим Гази әсәреннән өзекне филология фәннәре докторы Фоат Галимуллин укыды. Акциянең максаты - татар теленә кызыксынуны арттыру, әдәби телдә дөрес сөйләм һәм дөрес язу күнекмәләрен үстерү, орфографик һәм грамматик хаталар ясамыйча язу теләге уяту, татар теле белгечләрен һәм татар теле укытучыларын тагын да популярлаштыру.