3-9 июльдә Мәскәүдә «Россия креатив атнасы» фестиваль-форумы уза. Ел саен илнең креатив икътисады өлкәсендәге әлеге төп вакыйга үз мәйданчыгында меңләгән спикер һәм катнашучыларны җыя. Алар киләчәк креатив индустрияләр образы, үзебезнең продуктның көндәшлеккә сәләтлелеге турында фикер алыша.

Г. Камал исемендәге Татар дәүләт Академия театрының мәгълүмати технологияләр бүлеге башлыгы Линар Шәмсетдинов фестивальдә «Мәгариф һәм мәдәният мөмкинлекләрен арттыруда интерактив-цифрлы киңлекләрнең яңа ачышлары» сессиясе спикеры буларак катнашты. Ул «Г. Камал театрының “Шәрык клубы” интерактив мультимедия комплексы» доклады белән чыгыш ясады.