Бүген "Шәрык клубы" интерактив мультимедиа комплексында Казаннан мобилизацияләнүчеләрнең балалары өчен яңа ел бәйрәме уздырылды. Тамашалар шулай ук 27-30 декабрьдә һәм 4-7 гыйнварда булачак. Башлана: 15.00 сәгатьтә.

Кыш бабай үзенең ярдәмчеләре белән бер тылсымлы, серле хат җибәргән диләр. Бу хат "Шәрык клубы"ның кечкенә дусларына могҗизалы яңа ел серен ачу өчен йөгереп тә, атлап та, шуышып та, йөзеп тә меңләгән чакрымнарны үткән! Кыш бабай үзе дә нәни дуслары белән очрашуга ашыга икән. Ләкин билгеле булганча, бер генә яхшы әкият тә маҗараларсыз үтми. Бөтен яңалыклардан хәбәрдар булган " Саескан койрыгы" каналы хәбәр иткәнчә, хат югалган. Тылсымлы почта эшчәнлегендә мондый хәлнең әле булганы юк ди. Шулай да хатның Казанда, Татарстан урамындагы 8нче йорт тирәсендә булуы билгеле! Бу хатта нәрсә язылган икән, ул нинди мөһим тылсымлы серне яшерә, хатны урлаучыларны кем табырга булышыр?

Тылсымлы төргәкне билгеләнгән вакытта "Шәрык клубы"на килгән иң кыю, батыр малайлар һәм кызлар гына таба алачак икән.
Ашыгыгыз дуслар! Һәм калганнарга да яңа елның иң мөһим, серле яңалыклары турында сөйләргә онытмагыз.