2019 елның 1-8 июнендә Казанда Төрки халыкларның XIV "Нәүрүз" Халыкара театр фестивале үтә. Фестивальнең хэдлайнеры буларак  Nottara Румын театры "Мольер" спектакле белән чыгыш ясый. Авторлар – Ж.-Б. Мольер һәм М.А.Булгаков, режиссер – Р. Феодори (Красноярск). Спектакль 7 июньдә Г. Камал исемендәге Татар дәүләт Академия театрының зур сәхнәсендә күрсәтелә. 

Спектакль 2017 елда Олег Лоевский җитәкчелегендә узган DENS Театр Лабораториясе кысаларында сәхнәләштерелә. Ул дөнья драматургиясендә мөһим урын алып торган Мольер биографиясен заманча ача. Бөек комедиограф, шагыйрь һәм артистның пьесаларында аның биографиясенә кагылышлы шактый күп мәгълүмат яшерелгән. Хәтта Мольерның үлеме дә сәнгати атмосферага ия, чөнки драматург үзенең «Мнимый больной» спектаклендә уйнаган вакытта сәхнәдә вафат була. Роман Феодори үзенең спектаклендә, Михаил Булгаковның «Жизнь господина де Мольера» һәм «Кабала святош» китапларына нигезләнеп, шулай ук «Плутни Скапена», «Мнимый больной», «Тартюф», «Дон Жуан» пьесаларындагы мәгълүматларны да кулланып, Мольерның катлаулы тормышына яктылык өсти.

Спектакльне куйган вакытта режиссер Роман Феодори труппадан бер ритмда сулый һәм хәрәкәт иткән команда ясауга ирешә. Кеше психологиясен бар нечкәлеге белән аңлый белүе режиссерга, төрле булган 13 индивидуаль артистны  бердәм ансамбльгә оештырган, уртак мәгънәне табарга ярдәм итә.

Режиссер хакында:

Роман Феодори беренче белеме буенча - педагог-тарихчы. 2004 елда Санкт-Петербург дәүләт театр сәнгате академиясын тәмамлый (Геннадий Тростянецкий җитәкчелегендәге  режиссерлар курсы). Режиссер буларак Россиянең һәм Балтыйк илләренең күп кенә театрларында, шулай ук, А.П.Чехов исемендәге  Мәскәү сәнгать академия театрында, Милләтләр дәүләт театрында спектакльләр куя. В.М.Шукшин исемендәге Алтай драма театрында баш режиссер була.

2011 елдан – баш режиссер, 2016 елдан - Красноярск яшь тамашачылар театрының сәнгать җитәкчесе. Роман Феодори җитәкчелегендә Красноярск яшь тамашачылар театрында кызыклы иҗади һәм иҗтимагый-мәдәни проектлар тормышка ашырыла: ел саен үткәрелүче «Вешалка» актуаль драматургия һәм режиссура лабораториясе, «ClassAct» яшүсмерләр өчен драматургия лабораториясе (2013), начар ишетуче балалар катнашындагы «Человеческий голос» проекты (2014).

Роман Феодори спектакльләре халыкара, бөтенроссия һәм региональ фестивальләрдә төрле бүләкләргә лаек була. 

БИЛЕТ АЛЫРГА КАССА: (843) 293-03-74

***

XIV «Нәүрүз» спектакльләре Казанның 7 театраль мәйданында күрсәтеләчәк: Камал театрының Зур һәм Кече сәхнәләрендә, “Әкият” курчак театрының Зур һәм Кече залларында, Тинчурин, Кариев һәм Казан яшь тамашачылар театрлары сәхнәләрендә. Шулай ук Камал театры каршындагы мәйданда һәм Кабан күле яры буенда да спектакльләр уйналачак. Билетларны театр кассалары һәм сайтларыннан, шулай ук, билет сату операторларыннан алырга мөмкин.

Фестивальне оештыручылар: Россия Федерациясе мәдәният министрлыгы ярдәме белән Татарстан Республикасы мәдәният министрлыгы, Россия Федерациясе Театр эшлеклеләре берлеге ярдәме белән Татарстан Республикасы Театр эшлеклеләре берлеге, Г.Камал исемендәге Татар дәүләт Академия театры.