Кичә, 6 декабрьдә, Г.Камал исемендәге Татар дәүләт Академия театрында "Яңа татар пьесасы 2017" яшь драматурглар лабораториясе пьесаларын укуның беренче көне узды. Татарстанның халык артистлары Венера Шакирова, Илдус Габдрахманов, Татарстанның атказанган артисткасы Гүзәл Шакирова, Эмиль Талипов, Алмаз Гәрәев, Гөлчәчәк Хәмәдинурова, Ирек Кашапов һәм Айгөл Абашева Алсу Газтдинованың "Хөкем" һәм Сөмбел Гаффарованың "Парковка" пьесаларын укыдылар. 
Һәр укудан соң тамашачылар һәм лабораториянең кураторлары Евгений Казачков (драматург, "Любимовка" фестивале арт-директоры), Юлия Тупикина (драматург) һәм Миләүшә Хәбетдинова (филология фәннәре кандидаты, доцент) белән фикер алышу узды. Беренче көн укулары режиссеры буларак Лилия Әхмәтова чыгыш ясады. 
Бүген 17.00 сәгатьтә Кече сәхнәдә укуларның 2нче көне уза. Теркәлү.

Алсу Газтдинова

1987 елның 21 февралендә Казан шәһәрендә туа.  2009 елда «юриспруденция» һөнәре буенча Казан дәүләт университетын тәмамлый. 2010-2016 елларда Казанның Киров районы судында эшли. 2016 елдан Казан Федераль университеты Массакүләм коммуникацияләр һәм социаль фәннәр институтының татар журналистикасы кафедрасы магистратурасының Татар иҗтимагый-сәяси журналистикасы бүлеге студенты.

Сөмбел Гаффарова 

Язучы, драматург, журналист. 1980 елның 5 февралендә Казан шәһәрендә танылган язучы Әхәт Гаффар һәм галимә Фәридә Гаффарова гаиләсендә туа. 1996 елны Ш.Мәрҗани исемендәге татар гимназиясен тәмамлаганнан соң, Казан Дәүләт университетының татар филологиясе бүлегенә укырга керә. Бала чагыннан ук әкиятләр яза башлый. Әкият һәм хикәяләре төрле җыентыкларда урын ала, газета-журналларда басыла. 1996 елда аның «Безнең-сезнең дөньяда» исемле китабы дөнья күрә. 1997 елдан Татарстан Язучылар берлеге әгъзасы. «Ялкын» һәм «Сөембикә» журналларында эшли. 2007 елдан «Яңа татар пьесасы» бәйгесендә катнашып килә. 2015 елда Татарстан китап нәшриятында балалар өчен «Чынга ашачак хыял» дигән фәлсәфи-аллегорик повесте нәшер ителә.