Г.Камал исемендәге Татар дәүләт Академия театрында "Таңбатыр" әкиятенең репетицияләре бара. Пьеса татар халык әкиятенә нигезләнеп язылган. Автор - Мансур Гыйләҗев, режиссер - Олег Кинҗәгулов, рәссам - Ләйсән Хөсәенова, хореограф - Нүрбәк Батулла, композитор - Эльмира Галимова.

Узган сезонда Камал театры Мансур Гыйләҗевнең «Исәнмесез?!» спектаклен тәкъдим иткән иде. Быел драматург гаилә белән карау өчен татар халык әкиятләре буенча «Таңбатыр» пьесасын иҗат итте. Хәзерге заман балаларын тапкыр тиеннәр, тырыш керпеләр, куркуын җиңгән куяннар хакындагы әкиятләр белән шаккатырып булмый. Аларны үзенчәлекле, фантазиягә бай сюжет-саспенслар җәлеп итә. Андый әсәрләрдә геройларның чиксез маҗараларын күзәтәсең, тын да алмыйча аларның язмышы өчен борчылып утырасың. “Таңбатыр” әкияте дә көтелмәгән кызыклы борылышларга бик бай. Әлбәттә, яшь режиссёр Олег Кинҗәгуловның бай фантазиясе һәм заманча сәхнә технологияләре спектакльнең  тәэсирен тагын да арттыра.   

Спектакльдә катнашалар: Татарстанның атказанган артисты Фәнис Сафин, Эльвир Сәлимов, Алинә Мөдәрисова, Ришат Әхмәдуллин, Ирек Кашапов, Айгөл Абашева, Раил Шәмсуаров, Айгөл Шәкурова, Артур Шәйдуллин, Фәннүр Мөхәммәтҗанов һәм Мәдәният институтыннан Фәрит Бикчәнтәев студентлары.

Спектакльнең премьерасы 24-30 декабрьдә һәм 5-6 гыйнварда.

БИЛЕТ АЛЫРГА КАССА: (843) 293-03-74