1906 елның 22 декабрендә Казанда беренче тапкыр киң катлау тамашачылар өчен алдынгы яшьләр тарафыннан татарча ачык спектакль күрсәтелә, бу кичтә сәхнәдә “Кызганыч бала” драмасы һәм “Гыйшык бәласе” комедиясе уйнала. Шушы дата татар театрының туган көне дип санала...
Кадерле тамашачылар! Без бүген 114-яшьлегебезне онлайн-форматта үткәрәбез. Көн дәвамында коллегаларыбыздан котлаулар алачакбыз һәм аларны социаль челтәрләребезгә урнаштырачакбыз: вконтакте, инстаграм, фейсбук. 18-20 сәгатьтә Татарстан, Башкортстан һәм Оренбург өлкәсе татар театрлары катнашында безнең инстаграмда туры эфир үтәчәк. Быелгы катлаулы елга нәтиҗәләр ясарбыз, коллегаларыбызның татар театры туган көнен ничек уздырулары хакында сөйләшербез.
Бәйрәм онлайн-марафоны "Дәресе гыйбрәттер театр" сәфәр-спектакле белән тәмамланачак. Тамаша безнең рәсми сайтта kamalteatr.ru бушка күрсәтелә. Театрда күрешкәнгә кадәр!