29, 30 һәм 31 гыйнварда Камал театрының Кече сәхнәсендә "Яңа татар пьесасы 2020" лабораториясе драматурглары язган пьесалар укылачак. Әлеге чара режиссёрлар җитәкчелегендә Камал театры артистлары катнашында үтә.
Пьесаларны тыңларга килү өчен театрның ВКонтакте төркемендә махсус тема астында теркәү узарга кирәк. Теркәлү узган тамашачыларга шул ук көнне Зур залда узачак спектакльгә чакыру билетлары бирелә. Мәсәлән, әгәр сез 29 гыйнварга, пьесалар укуның беренче көненә теркәлсәгез, шул ук көнне 19.00 сәгатьтә үтәчәк "Исәнмесез!?." спектакленә 2 кешелек чакыру билетына ия булачаксыз.
Игътибар, спектакльләргә чакырулар пьесалар укылыр алдыннан театрда бирелә.