Режиссерлары: Зөлфия Вәлиева, Миләүшә Шәйхетдинова

Сез беләсезме, кайчандыр Казаннан килгән мәчеләр данлыклы Петербург Эрмитажын күселәрдән коткарган!

Бу гаҗәеп тарихны оныкларына һәм оныкчыкларына Бауман урамындагы йомшак кәнәфидә горурланып утыручы үзенчәлекле бер Мәче сөйләп бирер! Ул дуслары — Мишәрбай, Мурза, Каракүз, Таһирә, Маһирә һәм Койрык белән бергә маҗараларга һәм кызыклы хәлләргә бай сәяхәткә кузгала.

Башта мәчеләрнең һәркайсы үзенчә яши, аларга уртак тел табу да җиңел булмый. Әмма сәяхәт барышында алар дуслашырга, бер-берсенә ышанырга һәм ярдәм итәргә өйрәнәләр. Чөнки алда аларны мөһим бурыч көтә — Эрмитажны күселәрдән коткару! Ә моны алар берләшкәндә генә булдыра алачак.

Мюзикл стилендәге бу спектакль җыр, бию һәм үзенчәлекле сәхнә образлары аша тамашачыларга бергә булганда теләсә нинди кыенлыкны җиңеп булуын искәртә.

Кадерле балалар, безнең мыеклы геройлар белән бергә маҗараларга юл алыгыз! Сезне дуслык һәм үзара ярдәмләшү зур батырлыкларга илтә алуын күрсәткән мавыктыргыч тарих көтә!