КАМАЛ ТЕАТРЫ ГАЛИЯ КАЙБИЦКАЯ ҺӘМ НАИЛ ӘЮПОВНЫ ИСКӘ АЛУ КИЧӘЛӘРЕНДӘ КАТНАША

Г.Камал исемендәге Татар дәүләт Академия театры данлыклы артистлар Галия Кайбицкая һәм Наил Әюповны искә алу кичәләрендә катнаша. Әлеге чаралар 6 һәм 7 сентябрьдә Татарстанның Кайбыч һәм Мөслим районы Мәдәният йортларында үтә.

6 сентябрьдә 14.00 сәгатьтә Кайбыч районы Мәдәният йортында Татарстанның халык артисткасы Галия Кайбицкаяның тууына 110 ел тулуга багышланган кичә үтә. Россиянең һәм Татарстанның халык артисты Әзһәр Шакиров артистка хакындагы истәлекләре белән бүлешәчәк. Шулай ук кичәдә Россиянең атказанган, Татарстанның халык артисты Илдус Әхмәтҗанов, Татарстанның халык артистлары Фирая Әкбәрова һәм Фоат Әбүбәкеров, Татарстанның атказанган артистлары Илсөя Төхфәтуллина һәм Әхмәт Кәримов, Гөлчәчәк Гайфетдинова, Динә Закирова катнаша.

7 сентябрьдә 18.00 сәгатьтә Мөслим районы Мәдәният йортында Россиянең атказанган, Татарстанның халык артисты Наил Әюповны искә алу кичәсе үтә. Кичәдә Татарстанның халык артистлары Хәлим Җәләлов һәм Луара Шакирҗанова данлыклы артист хакындагы истәлекләре белән бүлешәчәк. Шулай ук әлеге чарада Россиянең атказанган, Татарстанның халык артисты Илдус Әхмәтҗанов, Татарстанның халык артистлары Фирая Әкбәрова, Әсхәт Хисмәтов, Фоат Әбүбәкеров, Татарстанның атказанган артисты Әхмәт Кәримов һәм Динә Закирова катнаша. Алар башкаруында шигырьләр, җырлар, музыкаль номерлар яңгыраячак.