РусТатEng

КАЗАНДА ТЫВА ТЕАТРЫ ГАСТРОЛЬЛӘРЕ АЧЫЛДЫ

Казанда төрки халыкларның “Нәүрүз” халыкара театр фестивале Тыва Республикасының В.Кок-Оола исемендәге Милли музыкаль-драма театрының ике көнлек гастрольләре белән дәвам итте. Кичә гастрольләр А.Цагарели буенча куелган “Ханума” комедиясе белән ачылды.

Гастрольләрне Тыва Республикасы Мәдәният министры урынбасары Марьятта Бадыргы һәм Г.Камал театры директоры Илфир Якупов ачты. Марьятта Бадыргы Татарстанга тыва халкыннан сәламнәр тапшырды, төрки халыкларның театр сәнгатенә багышланган “Нәүрүз” фестивале оештыру өчен рәхмәтләрен җиткерде. Илфир Якупов гастрольләрнең Тыва белән Татарстан Республикалары арасында алмаш булуын әйтеп, үзләренең август аенда Кызыл шәһәренә барачагын искәртте.

“Ханума”ны тамашачы тулы залда карады. Тамашачының бер өлеше тыва халкының театр сәнгатен күрергә килсә, икенчеләре танылган грузин комедиясен карау өчен килгән иде.

Комедиянең нигезендә ике яучының конкуренциясе ята. Кабато яшь чибәр Сонаны карт князь Вано Пантиашвилига кияүгә бирергә җыенып, үз кесәсен кайгыртса, Ханума өчен беренче урында - ул өйләнештергән парларның пар килүе. Ул бер-берсенә гашыйк Сона белән Котэга ярдәм итергә алына, князьга үз яшенә пар килгән Гуликоны табып бирә, бер уңайдан үз тормышын да кора.

Тыва милли театры Казанга өч спектакль белән килгән иде. Аның берсе –тыва халкының Бөек Ватан сугышы елларында батырлыгына багышланган “Торналар” спектакле “Нәүрүз” фестивале программасына кертелеп, ул К.Тинчурин театры бинасында күрсәтелде. Икенчесе – гастрольләрне ачкан “Ханума”, өченчесе - “Кан-Кыс” риваяте. Тылсымлы аргамагы белән бергә илен явыз ханнан коткарган батыр кыз турындагы риваятьне тамашачы бүген карый алачак.

Г.Камал театры Тывага үзенең Туфан Миңнуллин пьесасы буенча куелган “Җанкисәккәем” һәм Г.Камал буенча куелган “Банкрот” сатирик комедиясен алып бара. Спектакльләр 18 һәм 19 августта В.Кок-Оола исемендәге Милли музыкаль-драма театры сәхнәсендә була.

Касса: 293-03-74

ИА "Татар-информ"

Воскресенье 11.06.2017
0
Подпишитесь на рассылку, чтобы быть в курсе новостей театра