РусТатEng

МӘСКӘҮДӘ ТУФАН МИҢНУЛЛИН ИСТӘЛЕГЕНӘ БАГЫШЛАНГАН МУЗЫКАЛЬ КИЧӘ ҮТӘ

18 августта 19.00 сәгатьтә Мәскәүнең татар мәдәнияте үзәгендә (Асадуллаев йорты) данлыклы татар драматургы Туфан Миңнуллин истәлегенә багышланган музыкаль кичә үтә. Әлеге театральләштерелгән программа татар театрының 110 еллык юбилее кысаларында үткәрелә. Кичә “Әлдермештән Әлмәндәр” спектакле куелуга 40 ел булуга багышлана.

Г.Камал исемендәге Татар дәүләт Академия театры тарафыннан әзерләнгән әлеге чараның программасы 2012 елда арабыздан киткән данлыклы драматург Туфан Миңнуллин сүзләренә язылган җырлардан төзелгән. Камал театры сәхнәсендә Т.Миңнуллинның 30дан артык пьесасы буенча спектакльләр куелган. Музыкаль кичәдә “Әниләр һәм бәбиләр”, “Ай булмаса йолдыз бар”, “Җанкисәккәем”, “Гөргөри кияүләре”, “Галиябану”, “Диләфрүзгә дүрт кияү” һ.б. спектакльләрдән җырлар яңгыраячак, кайбер спектакльләрдән өзекләр уйналачак. Кичәдә Камал театры артистлары катнаша: Россиянең һәм Татарстанның халык артистлары Нәҗибә Ихсанова (Миңнуллина) һәм Равил Шәрәфиев, Татарстанның халык һәм Россиянең атказанган артисткасы Наилә Гәрәева, Татарстанның халык артисткасы Люция Хәмитова, Татарстанның атказанган артисты Олег Фазылҗанов, яшь артистлар Гүзәл Гөлвердиева, Фәннүр Мөхәммәтҗанов, Раил Шәмсуаров һәм башкалар.

Кичәдә шулай ук Татарстанның халык артистлары Лаура Шакирҗанова, Зөлфирә Зарипова, Әсхәт Хисмәтов, Камал театрының баш режиссеры Фәрит Бикчәнтәев һәм Туфан Миңнуллинның кызы – Әлфия Юнысова катнаша. Кайбер легендар спектакльләрдән җырларны Россиянең һәм Татарстанның халык артисткасы Зилә Сөнгатуллина, Татарстанның халык артисткасы Римма Ибраһимова һәм күп кенә бөтенроссия һәм халыкара конкурслар лауреаты  Айгөл Хәйри башкара.

Чара бөек татар шагыйре Габдулла Тукайның каберенә чәчәкләр кую тантанасы белән башланып китәчәк.

Музыкаль кичәгә чакыру билетларын Россиядәге Татарстанның вәкаләтле вәкиллегеннән алырга мөмкин. Моның өчен алдан adinaz@mail.ru адресына заявка җибәрү сорала. Адрес: Малый Татарский пер., 8, «Павелецкая», «Третьяковская»,  «Новокузнецкая» метро тукталышлары.

Среда 03.08.2016
0
Подпишитесь на рассылку, чтобы быть в курсе новостей театра